aaj aaya hai mere aage ek baDa gambhir sawal

aaj aaya hai mere aage ek baḌā gambhīr savāl

us kī har tahrīr talab hai us kī har taqrīr savāl

ḳhuun se apne likhte rahnā kyā kyā pur-tāsīr savāl

hijr kī shab phir ḳhud hī miTānā saare be-ta.abīr savāl

sar par chāñdī ug aa.ī hai lekin uqde kam na hue

ab bhī khaḌe haiñ raah meñ ban kar pairoñ kī zanjīr savāl

avval avval uf vo kisī kī kab aur kyoñ kā lutf-o-surūr

āḳhir āḳhir bante jaanā dil ke liye ta.azīr savāl

tadbīroñ ke nange sar par dast-e-duā kā saaya thā

merī ek ik haar pe mujh se kartī hai taqdīr savāl

lamhe phir se uḌ jaate haiñ de kar kuchh sat-range ḳhvāb

aur phir ik din ban jaanī hai ḳhvāboñ kī ta.abīr savāl

āñkheñ de nahīñ paatī haiñ jab āñkhoñ kā bharpūr javāb

chhalnī kar dete haiñ dil ko tab ban ban kar tiir savāl

zulm-o-sitam kā chaḌhtā sūraj amn-o-amāñ ke bujhte diip

aaj kī duniyā kī qismat haiñ kitne ātish-gīr savāl

ishq ne aisā cholā badlā husn ne aisā badlā ruup

jis ke aage is kal-yug meñ kal ke rāñjhe hiir savāl

hindī meñ ab paḌhte haiñ ham urdu kī nazmeñ ġhazleñ

urdu meñ ban jā.eñge āḳhir 'ġhālib' 'momin' 'mīr' savāl

farz samajh kar koshish karnā us ke kaam aane kī 'sahar'

vaqt ke hāthoñ jab ban jaa.e muflis kī tauqīr savāl

aaj aaya hai mere aage ek baDa gambhir sawal

us ki har tahrir talab hai us ki har taqrir sawal

KHun se apne likhte rahna kya kya pur-tasir sawal

hijr ki shab phir KHud hi miTana sare be-tabir sawal

sar par chandi ug aai hai lekin uqde kam na hue

ab bhi khaDe hain rah mein ban kar pairon ki zanjir sawal

awwal awwal uf wo kisi ki kab aur kyon ka lutf-o-surur

aaKHir aaKHir bante jaana dil ke liye tazir sawal

tadbiron ke nange sar par dast-e-dua ka saya tha

meri ek ek haar pe mujh se karti hai taqdir sawal

lamhe phir se uD jate hain de kar kuchh sat-range KHwab

aur phir ek din ban jaani hai KHwabon ki tabir sawal

aankhen de nahin pati hain jab aankhon ka bharpur jawab

chhalni kar dete hain dil ko tab ban ban kar tir sawal

zulm-o-sitam ka chaDhta suraj amn-o-aman ke bujhte dip

aaj ki duniya ki qismat hain kitne aatish-gir sawal

ishq ne aisa chola badla husn ne aisa badla rup

jis ke aage is kal-yug mein kal ke ranjhe hir sawal

hindi mein ab paDhte hain hum urdu ki nazmen ghazlen

urdu mein ban jaenge aaKHir 'ghaalib' 'momin' 'mir' sawal

farz samajh kar koshish karna us ke kaam aane ki 'sahar'

waqt ke hathon jab ban jae muflis ki tauqir sawal