aaj apne dil se phir uljha hun main

aaj apne dil se phir uljhā huuñ maiñ

mudda'ā ye hai ki dekhūñ kyā huuñ maiñ

roknā ai māddiyat ke hijāb

ḳhud-baḳhud ifshā huā jaatā huuñ maiñ

hai mirī āñkhoñ meñ kaif-e-be-ḳhudī

ḳhvāb-e-doshīñ se abhī jaagā huuñ maiñ

chāñdnī rātoñ meñ jab uThtī hai mauj

nuur ban kar chāñd meñ bahtā huuñ maiñ

kis qadar rangīn hai merā mizāj

sub.h ke phūloñ kā gahvāra huuñ maiñ

gulsitāñ meñ chheḌ kar ġhunchoñ ke saaz

ḳhud-baḳhud ik giit gā letā huuñ maiñ

jāda-e-hastī hai ik rāh-e-ġhalat

ye kahāñ gum ho ke aa pahuñchā huuñ maiñ

duur tak koī nahīñ hai ham-ḳhayāl

aise ḳhvāb-ābād meñ tanhā huuñ maiñ

kārvān-e-zindagī aage gayā

pur-ġhubār ik sub.h kā taarā huuñ maiñ

tang hai mujh par fāzā-e-kā.enāt

zarre kī āġhosh meñ sahrā huuñ maiñ

zindagī kī bujh ga.iiñ sham'eñ 'ziyā'

tīrgī-e-shab kā parvāna huuñ maiñ

aaj apne dil se phir uljha hun main

mudda'a ye hai ki dekhun kya hun main

rokna ai maddiyat ke hijab

KHud-baKHud ifsha hua jata hun main

hai meri aankhon mein kaif-e-be-KHudi

KHwab-e-doshin se abhi jaga hun main

chandni raaton mein jab uThti hai mauj

nur ban kar chand mein bahta hun main

kis qadar rangin hai mera mizaj

subh ke phulon ka gahwara hun main

gulsitan mein chheD kar ghunchon ke saz

KHud-baKHud ek git ga leta hun main

jada-e-hasti hai ek rah-e-ghalat

ye kahan gum ho ke aa pahuncha hun main

dur tak koi nahin hai ham-KHayal

aise KHwab-abaad mein tanha hun main

karwan-e-zindagi aage gaya

pur-ghubar ek subh ka tara hun main

tang hai mujh par faza-e-kaenat

zarre ki aaghosh mein sahra hun main

zindagi ki bujh gain sham'en 'ziya'

tirgi-e-shab ka parwana hun main