aaj bazm-e-naz mein wo intishaar-e-naghma hai

aaj bazm-e-nāz meñ vo intishār-e-naġhma hai

sāz-e-dil kī har sadā nā-sāzgār-e-naġhma hai

mere sāz-e-ġham se duniyā hī nahīñ hai muztarib

vus.at-e-kaun-o-makāñ bhī sogvār-e-naġhma hai

dast-e-rañgīñ meñ kisī ke aa gayā phir sāz-e-dil

merā har tār-e-nafas phir be-qarār-e-naġhma hai

us ko aa.egī nazar kyā ḳhaak tasvīr-e-alam

jis ke dil kā aa.ina pur-az ġhubār-e-naġhma hai

jab se shāmil ho ga.ī hai naġhmagī-e-sāz-e-dil

merā naala ġhairat-e-kaif-e-bahār-e-naġhma hai

kaash hotā 'muslim'-e-rañgīñ navā-e-shauq bhī

aaj kā māhaul kitnā sāzgār-e-naġhma hai

aaj bazm-e-naz mein wo intishaar-e-naghma hai

saz-e-dil ki har sada na-sazgar-e-naghma hai

mere saz-e-gham se duniya hi nahin hai muztarib

wusat-e-kaun-o-makan bhi sogwar-e-naghma hai

dast-e-rangin mein kisi ke aa gaya phir saz-e-dil

mera har tar-e-nafas phir be-qarar-e-naghma hai

us ko aaegi nazar kya KHak taswir-e-alam

jis ke dil ka aaina pur-az ghubar-e-naghma hai

jab se shamil ho gai hai naghmagi-e-saz-e-dil

mera nala ghairat-e-kaif-e-bahaar-e-naghma hai

kash hota 'muslim'-e-rangin nawa-e-shauq bhi

aaj ka mahaul kitna sazgar-e-naghma hai