aaj bhi ahl-e-nazar gar kahin pae jate

aaj bhī ahl-e-nazar gar kahīñ paa.e jaate

aañkh meñ paate jagah dil meñ basā.e jaate

gaañv ke log mujhe bhuul ga.e haiñ varna

merī aamad pe makānāt sajā.e jaate

zindagī tujh se bahut pyaar hai ham ko lekin

ab tire naaz nahīñ ham se uThā.e jaate

roz karte na.e alfāz kī rang-āmezī

zindagī-bhar tirī tasvīr banā.e jaate

koī to husn hai ham meñ bhī kashish hai koī

varna duniyā kī numā.ish meñ na laa.e jaate

ai 'ḳhalish' vo tumheñ mahfil meñ bulātā ik din

us kī āvāz meñ āvāz milā.e jaate

aaj bhi ahl-e-nazar gar kahin pae jate

aankh mein pate jagah dil mein basae jate

ganw ke log mujhe bhul gae hain warna

meri aamad pe makanat sajae jate

zindagi tujh se bahut pyar hai hum ko lekin

ab tere naz nahin hum se uThae jate

roz karte nae alfaz ki rang-amezi

zindagi-bhar teri taswir banae jate

koi to husn hai hum mein bhi kashish hai koi

warna duniya ki numaish mein na lae jate

ai 'KHalish' wo tumhein mahfil mein bulata ek din

us ki aawaz mein aawaz milae jate