aaj bhi yaad-e-yar baqi hai

aaj bhī yād-e-yār baaqī hai

ishq kā e'tibār baaqī hai

zindagī kī ramaq hai ham meñ abhī

aap kā intizār baaqī hai

yādgār-e-junūñ hamāre paas

dāman-e-tār-tār baaqī hai

phir rahe haiñ salīb uThā.e ham

haañ abhī vasl-e-dār baaqī hai

ye umīdeñ na chhīn leñ hālāt

bas yahī iḳhtiyār baaqī hai

lafz-o-mā'nī kī vus'atoñ ke saath

she'r kā iḳhtisār baaqī hai

marhabā ushshāqān-e-haq tum se

kuchh umīd-e-bahār baaqī hai

aaj bhi yaad-e-yar baqi hai

ishq ka e'tibar baqi hai

zindagi ki ramaq hai hum mein abhi

aap ka intizar baqi hai

yaadgar-e-junun hamare pas

daman-e-tar-tar baqi hai

phir rahe hain salib uThae hum

han abhi wasl-e-dar baqi hai

ye umiden na chhin len haalat

bas yahi iKHtiyar baqi hai

lafz-o-ma'ni ki wus'aton ke sath

she'r ka iKHtisar baqi hai

marhaba ushshaqan-e-haq tum se

kuchh umid-e-bahaar baqi hai