aaj hum isko laDa denge tere tir ke sath

aaj ham is ko laḌā deñge tire tiir ke saath

aah bhī tiir hai gar aah ho tāsīr ke saath

fikr-e-uqbā bhī rahe rif.at-o-tauqīr ke saath

qabr ta.amīr ho har qasr kī ta.amīr ke saath

ab kisī fitna-e-mahshar ke baneñge shāgird

ham bhī ab chaal chaleñge falak-e-pīr ke saath

dil parī-ḳhāna banā aks-e-parī-paikar se

uḌ chalā saarā makāñ ek hī tasvīr ke saath

rang-o-roġhan ke pas-e-parda hai saada kāġhaz

shakl-e-pīrī bhī javānī kī hai tasvīr ke saath

maiñ ḳhatāvār huuñ us vaqt jab ai dāvar-e-hashr

merī niyyat bhī ho sābit mirī taqsīr ke saath

tum hī milte nahīñ lekin ḳhat-e-qismat merā

miltā-jultā hai tumhāre ḳhat-e-taqdīr ke saath

ġhair ke dil meñ na rah jaa.e kahīñ tiir us kā

us ne jab tiir chalāyā maiñ uḌā tiir ke saath

kahte haiñ aah tirī ban ga.ī bijlī kyūñkar

yā mire saath chalī yā mirī shamshīr ke saath

ye mirā nāma-e-a.amāl hai ai dāvar-e-hashr

tū ise dekh milā kar ḳhat-e-taqdīr ke saath

aaj hum is ko laDa denge tere tir ke sath

aah bhi tir hai gar aah ho tasir ke sath

fikr-e-uqba bhi rahe rifat-o-tauqir ke sath

qabr tamir ho har qasr ki tamir ke sath

ab kisi fitna-e-mahshar ke banenge shagird

hum bhi ab chaal chalenge falak-e-pir ke sath

dil pari-KHana bana aks-e-pari-paikar se

uD chala sara makan ek hi taswir ke sath

rang-o-roghan ke pas-e-parda hai sada kaghaz

shakl-e-piri bhi jawani ki hai taswir ke sath

main KHatawar hun us waqt jab ai dawar-e-hashr

meri niyyat bhi ho sabit meri taqsir ke sath

tum hi milte nahin lekin KHat-e-qismat mera

milta-julta hai tumhaare KHat-e-taqdir ke sath

ghair ke dil mein na rah jae kahin tir us ka

us ne jab tir chalaya main uDa tir ke sath

kahte hain aah teri ban gai bijli kyunkar

ya mere sath chali ya meri shamshir ke sath

ye mera nama-e-amal hai ai dawar-e-hashr

tu ise dekh mila kar KHat-e-taqdir ke sath