aaj hi fursat se kal ka masala chheDunga main

aaj hī fursat se kal kā mas.ala chheḌūñgā maiñ

mas.ala hal ho to hal kā mas.ala chheḌūñgā maiñ

vasl o hijrāñ meñ tanāsub raast honā chāhiye

ishq ke radd-e-amal kā mas.ala chheḌūñgā maiñ

dekhnā sab log mujh ko ḳhārjī Thahrā.eñge

kal yahāñ jañg-e-jamal kā mas.ala chheḌūñgā maiñ

kashtiyoñ vaale mujhe tāvān de kar paar jaa.eñ

varna lahroñ meñ ḳhalal kā mas.ala chheḌūñgā maiñ

mil hī jā.eñge kahīñ to mujh ko 'bedil-haidarī'

kūza-gar vaalī ġhazal kā mas.ala chheḌūñgā maiñ

is shajar kī ek Tahnī parle āñgan meñ bhī hai

apne ham-sā.e se phal kā mas.ala chheḌūñgā maiñ

aaj hi fursat se kal ka masala chheDunga main

masala hal ho to hal ka masala chheDunga main

wasl o hijran mein tanasub rast hona chahiye

ishq ke radd-e-amal ka masala chheDunga main

dekhna sab log mujh ko KHarji Thahraenge

kal yahan jang-e-jamal ka masala chheDunga main

kashtiyon wale mujhe tawan de kar par jaen

warna lahron mein KHalal ka masala chheDunga main

mil hi jaenge kahin to mujh ko 'bedil-haidari'

kuza-gar wali ghazal ka masala chheDunga main

is shajar ki ek Tahni parle aangan mein bhi hai

apne ham-sae se phal ka masala chheDunga main