aaj kuchh kahne ko thi shoKHi-e-tadbir meri

aaj kuchh kahne ko thī shoḳhī-e-tadbīr mirī

hañs paḌī paas khaḌī thī kahīñ taqdīr mirī

TūTte hī se huī dil meñ kashākash paidā

merī taḳhrīb meñ poshīda thī ta.amīr mirī

hurriyat zulmat-e-zindāñ meñ janam letī hai

inqilābāt kī tārīḳh hai zanjīr mirī

apnī jānib kabhī dekhā hī nahīñ thā varna

vus.ateñ donoñ jahānoñ kī haiñ jāgīr mirī

dostī kaisī rah-o-rasm-e-umūmī bhī ga.ī

pyaar kī baat kahī aap se taqsīr mirī

maiñ kahāñ aap kahāñ diid kī ummīd kahāñ

yaad aa.uuñ jo kabhī dekhiye tasvīr mirī

ibrat-āmoz hai duniyā kā taġhayyur 'jāmī'

mujh se miltī nahīñ do roz kī tasvīr mirī

aaj kuchh kahne ko thi shoKHi-e-tadbir meri

hans paDi pas khaDi thi kahin taqdir meri

TuTte hi se hui dil mein kashakash paida

meri taKHrib mein poshida thi tamir meri

hurriyat zulmat-e-zindan mein janam leti hai

inqilabaat ki tariKH hai zanjir meri

apni jaanib kabhi dekha hi nahin tha warna

wusaten donon jahanon ki hain jagir meri

dosti kaisi rah-o-rasm-e-umumi bhi gai

pyar ki baat kahi aap se taqsir meri

main kahan aap kahan did ki ummid kahan

yaad aaun jo kabhi dekhiye taswir meri

ibrat-amoz hai duniya ka taghayyur 'jami'

mujh se milti nahin do roz ki taswir meri