aaj mauqa hai jo kahna hai meri jaan kahiye

aaj mauqa hai jo kahnā hai mirī jaañ kahiye

phir na shāyad ho kabhī vaqt mehrbāñ kahiye

itnī qabreñ haiñ umīdoñ kī mire dil meñ ki ab

shahr-e-dil ko bhī mire shahr-e-ḳhamoshāñ kahiye

yuuñ to is shahr meñ sab dost haiñ apne lekin

kis ko hamdard kise dard kā darmāñ kahiye

tīrgī rātoñ kī jhelī hai ki aa.egī kabhī

sub.h ik aisī jise sub.h-e-daraḳhshāñ kahiye

sahte aa.e haiñ sitam aap ke hañste hue ham

aur bhī dil meñ agar ho koī armāñ kahiye

dhund phailegī udāsī kī abhī duur talak

hijr kī rut hai jise fasl-e-zamistāñ kahiye

kis ke ḳhvāboñ se sajā rakkhī haiñ āñkheñ apnī

kis kī ḳhātir hai ye palkoñ pe charāġhāñ kahiye

aaj mauqa hai jo kahna hai meri jaan kahiye

phir na shayad ho kabhi waqt mehrban kahiye

itni qabren hain umidon ki mere dil mein ki ab

shahr-e-dil ko bhi mere shahr-e-KHamoshan kahiye

yun to is shahr mein sab dost hain apne lekin

kis ko hamdard kise dard ka darman kahiye

tirgi raaton ki jheli hai ki aaegi kabhi

subh ek aisi jise subh-e-daraKHshan kahiye

sahte aae hain sitam aap ke hanste hue hum

aur bhi dil mein agar ho koi arman kahiye

dhund phailegi udasi ki abhi dur talak

hijr ki rut hai jise fasl-e-zamistan kahiye

kis ke KHwabon se saja rakkhi hain aankhen apni

kis ki KHatir hai ye palkon pe charaghan kahiye