aaj phir saqi-e-gulfam se baaten hongi

aaj phir sāqī-e-gulfām se bāteñ hoñgī

mai-gusāroñ kī mai-o-jām se bāteñ hoñgī

phir tire āriz-o-gesū ke nazāre hoñge

phir na.ī sub.h na.ī shaam se bāteñ hoñgī

ho chukīñ aish-o-masarrat se bahut kuchh bāteñ

hoñgī ab to ġham-o-ālām se bāteñ hoñgī

umr-bhar khā.eñge ham vāda-e-fardā kā fareb

umr-bhar hasrat-e-nākām se bāteñ hoñgī

hogī ḳhalvat meñ bhī haa.il na ḳhamoshī mujh ko

naqsh-e-dīvār-o-dar-o-bām se bāteñ hoñgī

gardish-e-jām se lab hoñge mire mahv-e-kalām

jab mirī gardish-e-ayyām se bāteñ hoñgī

murġh-e-dil zauq-e-asīrī pe hai maa.il 'ummīd'

kis kī zulfoñ ke hasīñ daam se bāteñ hoñgī

aaj phir saqi-e-gulfam se baaten hongi

mai-gusaron ki mai-o-jam se baaten hongi

phir tere aariz-o-gesu ke nazare honge

phir nai subh nai sham se baaten hongi

ho chukin aish-o-masarrat se bahut kuchh baaten

hongi ab to gham-o-alam se baaten hongi

umr-bhar khaenge hum wada-e-farda ka fareb

umr-bhar hasrat-e-nakaam se baaten hongi

hogi KHalwat mein bhi hail na KHamoshi mujh ko

naqsh-e-diwar-o-dar-o-baam se baaten hongi

gardish-e-jam se lab honge mere mahw-e-kalam

jab meri gardish-e-ayyam se baaten hongi

murgh-e-dil zauq-e-asiri pe hai mail 'ummid'

kis ki zulfon ke hasin dam se baaten hongi