aaj phir us gali mein jate hain

aaj phir us galī meñ jaate haiñ

apnī qismat ko āzmāte haiñ

lab-e-shīrīñ se dete haiñ dushnām

shahd meñ zahr vo milāte haiñ

kījiye vaar teġh-e-abrū kā

sar-e-taslīm ham jhukāte haiñ

'ishq meñ ho ga.e haiñ ham mazdūr

naaz mahbūboñ ke uThāte haiñ

mujh ko ghāyal jo un ko karnā hai

zahr meñ teġh ko bujhāte haiñ

vo baras paḌte haiñ agar mujh par

mere dil kī lagī bujhāte haiñ

zulf chhū lī jo maiñ ne vo bole

tum se gustāḳh maar khāte haiñ

hijr meñ kyā kaheñ ġhizā kyā hai

ġham-e-jāñ-kāh roz khāte haiñ

mujh se raunaq hai un kī mahfil kī

sham.a-sāñ mujh ko vo jalāte haiñ

baad murdan ye un kī dil-sozī

sham' le kar lahad pe aate haiñ

tark-e-ishq-e-butāñ kiyā ai 'badr'

ab madīne ko ham to jaate haiñ

aaj phir us gali mein jate hain

apni qismat ko aazmate hain

lab-e-shirin se dete hain dushnam

shahd mein zahr wo milate hain

kijiye war tegh-e-abru ka

sar-e-taslim hum jhukate hain

'ishq mein ho gae hain hum mazdur

naz mahbubon ke uThate hain

mujh ko ghayal jo un ko karna hai

zahr mein tegh ko bujhate hain

wo baras paDte hain agar mujh par

mere dil ki lagi bujhate hain

zulf chhu li jo main ne wo bole

tum se gustaKH mar khate hain

hijr mein kya kahen ghiza kya hai

gham-e-jaan-kah roz khate hain

mujh se raunaq hai un ki mahfil ki

shama-san mujh ko wo jalate hain

baad murdan ye un ki dil-sozi

sham' le kar lahad pe aate hain

tark-e-ishq-e-butan kiya ai 'badr'

ab madine ko hum to jate hain