aaj tak tu ne bata kis se wafa ki ai dost

aaj tak tū ne batā kis se vafā kī ai dost

qarya-e-dil-zadgāñ tujh se hai shākī ai dost

ye sahīfa hai mire ḳhūñ-shuda ilhāmoñ kā

na uḌā dhajjiyāñ manshūr-e-vafā kī ai dost

phuul bhī gosh-bar-āvāz sadā rahte haiñ

ye hai tāsīr mire soz-e-navā kī ai dost

rakh liyā jis ne tirī mast ḳhirāmī kā bharam

daad de mujh ko mirī laġhzish-e-pā kī ai dost

kirchiyāñ tak na rahīñ jām-o-subū kī baaqī

ḳhair se jab se huā tū mirā saaqī ai dost

sī diye lab mire in surma.ī palkoñ ne tirī

kaise rūdād kahūñ terī jafā kī ai dost

ḳhāksāroñ se mirī jaan tū dāman na bachā

qadr kar halqa-e-arbāb-e-vafā kī ai dost

jins-e-kashkol-e-muqaddar na samajh mujh ko 'razā'

itnī tauhīn na kar merī anā kī ai dost

aaj tak tu ne bata kis se wafa ki ai dost

qarya-e-dil-zadgan tujh se hai shaki ai dost

ye sahifa hai mere KHun-shuda ilhamon ka

na uDa dhajjiyan manshur-e-wafa ki ai dost

phul bhi gosh-bar-awaz sada rahte hain

ye hai tasir mere soz-e-nawa ki ai dost

rakh liya jis ne teri mast KHirami ka bharam

dad de mujh ko meri laghzish-e-pa ki ai dost

kirchiyan tak na rahin jam-o-subu ki baqi

KHair se jab se hua tu mera saqi ai dost

si diye lab mere in surmai palkon ne teri

kaise rudad kahun teri jafa ki ai dost

KHaksaron se meri jaan tu daman na bacha

qadr kar halqa-e-arbab-e-wafa ki ai dost

jins-e-kashkol-e-muqaddar na samajh mujh ko 'raza'

itni tauhin na kar meri ana ki ai dost