aaj to din bhar teri taswir hum dekha kiye

aaj to din bhar tirī tasvīr ham dekhā kiye

ya.anī apne ḳhvāb kī ta.abīr ham dekhā kiye

ham ne dekhā hī nahīñ āñkheñ uThā kar samt-e-gul

apne dil kā zaḳhm dāman-gīr ham dekhā kiye

ishq-e-avval kī shab-e-dījūr meñ ai zindagī

zulf terī yā koī zanjīr ham dekhā kiye

aaj ham dekhā kiye chashm-e-sitam-gar ko ḳhajil

aaj apnī aah kī tāsīr ham dekhā kiye

ham ne to dekhā nahīñ apnī razā se kuchh yahāñ

jo bhī dikhlātī rahī taqdīr ham dekhā kiye

aaj to din bhar teri taswir hum dekha kiye

yani apne KHwab ki tabir hum dekha kiye

hum ne dekha hi nahin aankhen uTha kar samt-e-gul

apne dil ka zaKHm daman-gir hum dekha kiye

ishq-e-awwal ki shab-e-dijur mein ai zindagi

zulf teri ya koi zanjir hum dekha kiye

aaj hum dekha kiye chashm-e-sitam-gar ko KHajil

aaj apni aah ki tasir hum dekha kiye

hum ne to dekha nahin apni raza se kuchh yahan

jo bhi dikhlati rahi taqdir hum dekha kiye