aaKHir-e-shab jo fazaon mein chhiDa hota hai

āḳhir-e-shab jo fazāoñ meñ chhiḌā hotā hai

vo bhī kyā naġhma-e-be-sāz-o-sadā hotā hai

ham tirī bazm se uTThe to magar yuuñ uTThe

jis tarah koī ḳhud apne se judā hotā hai

kyā 'ajab shahr hai ye shahr-e-shanāsā.ī bhī

jo bhī chehra nazar aatā hai nayā hotā hai

tere hāthoñ kī mahak aatī hai un se aksar

jin kitāboñ pe mirā naam likhā hotā hai

vaqt kī dhuup meñ huuñ dasht-navard-e-hālāt

apnā saaya bhī jahāñ qad se baḌā hotā hai

mere dāman pe jise kahte haiñ sab dil kā lahū

un ke hāthoñ meñ vahī rang-e-hinā hotā hai

phir bahār aa.ī tirī yaad kā mausam aaya

phir mire dil kā har ik zaḳhm harā hotā hai

merī ḳhātir bhī zarā logoñ kī jānib dekho

maiñ vo katba huuñ jo chehroñ pe likhā hotā hai

'badr' yuuñ dil meñ hai ab zaḳhm-e-tamannā kī bahār

shāḳh meñ jaise koī phuul khilā hotā hai

aaKHir-e-shab jo fazaon mein chhiDa hota hai

wo bhi kya naghma-e-be-saz-o-sada hota hai

hum teri bazm se uTThe to magar yun uTThe

jis tarah koi KHud apne se juda hota hai

kya 'ajab shahr hai ye shahr-e-shanasai bhi

jo bhi chehra nazar aata hai naya hota hai

tere hathon ki mahak aati hai un se aksar

jin kitabon pe mera nam likha hota hai

waqt ki dhup mein hun dasht-naward-e-haalat

apna saya bhi jahan qad se baDa hota hai

mere daman pe jise kahte hain sab dil ka lahu

un ke hathon mein wahi rang-e-hina hota hai

phir bahaar aai teri yaad ka mausam aaya

phir mere dil ka har ek zaKHm hara hota hai

meri KHatir bhi zara logon ki jaanib dekho

main wo katba hun jo chehron pe likha hota hai

'badr' yun dil mein hai ab zaKHm-e-tamanna ki bahaar

shaKH mein jaise koi phul khila hota hai