aaKHir ye husn chhup na sakega naqab mein

āḳhir ye husn chhup na sakegā naqāb meñ

sharmāoge tumhīñ na karo zid hijāb meñ

pāmāl shoḳhiyoñ meñ karo tum zamīn ko

Dālūñ falak pe zalzale meñ iztirāb meñ

raushan hai āftāb kī nisbat charāġh se

nisbat vahī hai aap meñ aur āftāb meñ

dil kī girah na vā huī dard-e-shab-e-visāl

guzrī tamām bast-o-kushād-e-naqāb meñ

jaañ maiñ ne nāma-bar ke qadam par nisār kī

thā pesh-e-pā fatāda ye mazmūñ javāb meñ

hañs hañs ke barq ko to zarā kiije be-qarār

ro ro ke abr ko maiñ Dubotā huuñ aab meñ

vaa.iz se Dar ga.e ki na shāmil hue ham aaj

tartīb-e-mahfil-e-mai-o-cha.g-o-rabāb meñ

saaqī idhar to dekh ki ham dair-e-mast haiñ

kuchh mastī-e-nigah bhī milā de sharāb meñ

dāḳhil na dushmanoñ meñ na ahbāb meñ shumār

madd-e-fuzūl huuñ maiñ tumhāre hisāb meñ

kis kis ke jaur uThā.eñge aage ko dekhiye

dushman hai charḳh-e-pīr zamān-e-shabāb meñ

paiġhāmbar ishāra-e-abrū se mar gayā

phir jī uThegā lab bhī hilā do javāb meñ

aaKHir ye husn chhup na sakega naqab mein

sharmaoge tumhin na karo zid hijab mein

pamal shoKHiyon mein karo tum zamin ko

Dalun falak pe zalzale mein iztirab mein

raushan hai aaftab ki nisbat charagh se

nisbat wahi hai aap mein aur aaftab mein

dil ki girah na wa hui dard-e-shab-e-visal

guzri tamam bast-o-kushad-e-naqab mein

jaan main ne nama-bar ke qadam par nisar ki

tha pesh-e-pa fatada ye mazmun jawab mein

hans hans ke barq ko to zara kije be-qarar

ro ro ke abr ko main Dubota hun aab mein

waiz se Dar gae ki na shamil hue hum aaj

tartib-e-mahfil-e-mai-o-chag-o-rabab mein

saqi idhar to dekh ki hum dair-e-mast hain

kuchh masti-e-nigah bhi mila de sharab mein

daKHil na dushmanon mein na ahbab mein shumar

madd-e-fuzul hun main tumhaare hisab mein

kis kis ke jaur uThaenge aage ko dekhiye

dushman hai charKH-e-pir zaman-e-shabab mein

paighambar ishaara-e-abru se mar gaya

phir ji uThega lab bhi hila do jawab mein