aaKHiri hichki pe hai nashshe ki saghar jaga

āḳhirī hichkī pe hai nashshe kī sāġhar jaagā

pyaas ko niiñd jab aa.ī to samundar jaagā

raat bhī din kī tarah merī pareshāñ guzrī

maiñ na jaagā to mire ḳhvāb kā paikar jaagā

ek aahaT sī achānak huī dil ko mahsūs

kisī derīna tamannā kā muqaddar jaagā

sub.h hote hī ḳhudā jaane chalā jaa.e kidhar

rāt-bhar shāḳh pe is ġham meñ gul-e-tar jaagā

thartharāne lage kyuuñ shīsh-mahal aap se aap

kyā kisī TuuTe makāñ kā koī patthar jaagā

lauT aa.e vahī āvārā-o-gum-gashta ḳhayāl

aañkh khulte hī nazāroñ kā samundar jaagā

chhoḌ aayā thā jo maiñ pichhle janam meñ 'sā.ib'

zehn meñ aaj un armānoñ kā lashkar jaagā

aaKHiri hichki pe hai nashshe ki saghar jaga

pyas ko nind jab aai to samundar jaga

raat bhi din ki tarah meri pareshan guzri

main na jaga to mere KHwab ka paikar jaga

ek aahaT si achanak hui dil ko mahsus

kisi derina tamanna ka muqaddar jaga

subh hote hi KHuda jaane chala jae kidhar

raat-bhar shaKH pe is gham mein gul-e-tar jaga

thartharane lage kyun shish-mahal aap se aap

kya kisi TuTe makan ka koi patthar jaga

lauT aae wahi aawara-o-gum-gashta KHayal

aankh khulte hi nazaron ka samundar jaga

chhoD aaya tha jo main pichhle janam mein 'saib'

zehn mein aaj un armanon ka lashkar jaga