aalam-e-imkan mein duniya ki hawa thi main na tha

ālam-e-imkāñ meñ duniyā kī havā thī maiñ na thā

jalvā-ārā sirf zāt-e-kibriyā thī maiñ na thā

kar diyā bedār jis ne sākinān-e-arsh ko

vo kisī dard-āshnā dil kī sadā thī maiñ na thā

muntashir jis ne kiyā thā un kī zulf-e-nāz ko

sach agar pūchho to vo bād-e-sabā thī maiñ na thā

khul gayā jo rāz-e-ulfat aaj ahl-e-bazm par

ye tumhārī mast nazroñ kī ḳhatā thī maiñ na thā

tañg aa kar gardish-e-ayyām se bahr-e-sujūd

vo to merī zindagī vaqf-e-duā thī maiñ na thā

had se jab 'qaisar' baḌhī un kī jafā-e-nā-ravā

jo ba-rū-e-kār aa.ī vo vafā thī maiñ na thā

aalam-e-imkan mein duniya ki hawa thi main na tha

jalwa-ara sirf zat-e-kibriya thi main na tha

kar diya bedar jis ne sakinan-e-arsh ko

wo kisi dard-ashna dil ki sada thi main na tha

muntashir jis ne kiya tha un ki zulf-e-naz ko

sach agar puchho to wo baad-e-saba thi main na tha

khul gaya jo raaz-e-ulfat aaj ahl-e-bazm par

ye tumhaari mast nazron ki KHata thi main na tha

tang aa kar gardish-e-ayyam se bahr-e-sujud

wo to meri zindagi waqf-e-dua thi main na tha

had se jab 'qaisar' baDhi un ki jafa-e-na-rawa

jo ba-ru-e-kar aai wo wafa thi main na tha