aalam-e-sajda hai mera ek aalam nur ka

ālam-e-sajda hai merā ek aalam nuur kā

sajda-gah par merī dhokā ho rahā hai tuur kā

ek aalam ham-navā hai sāhib-e-maqdūr kā

saath detā hai kahāñ koī kisī majbūr kā

shiddat-e-ehsās-e-tanhā.ī kī haiñ hamdardiyāñ

dard baḌh jaatā hai aksar raat ko ranjūr kā

tiir ne naapī haiñ shāyad zaḳhm kī gahrā.iyāñ

ilm bechāre ko kyā hai sadma-e-mastūr kā

sham.a raushan hai kahāñ is kā pata chaltā nahīñ

par nazar ko hai yaqīñ maujūdgī-e-nūr kā

haiñ kabhī nazreñ tamanna par kabhī ummīd par

ya.anī hasrat-nāk aalam hai dil-e-majbūr kā

tujh meñ aur tere tasavvur meñ zarā sā farq hai

ek manzar paas kā hai ek manzar duur kā

sarfarāzī-o-navāzish kā sunā hai sirf naam

ai 'zakī' un se to rishta bhī nahīñ hai duur kā

aalam-e-sajda hai mera ek aalam nur ka

sajda-gah par meri dhoka ho raha hai tur ka

ek aalam ham-nawa hai sahib-e-maqdur ka

sath deta hai kahan koi kisi majbur ka

shiddat-e-ehsas-e-tanhai ki hain hamdardiyan

dard baDh jata hai aksar raat ko ranjur ka

tir ne napi hain shayad zaKHm ki gahraiyan

ilm bechaare ko kya hai sadma-e-mastur ka

shama raushan hai kahan is ka pata chalta nahin

par nazar ko hai yaqin maujudgi-e-nur ka

hain kabhi nazren tamanna par kabhi ummid par

yani hasrat-nak aalam hai dil-e-majbur ka

tujh mein aur tere tasawwur mein zara sa farq hai

ek manzar pas ka hai ek manzar dur ka

sarfaraazi-o-nawazish ka suna hai sirf nam

ai 'zaki' un se to rishta bhi nahin hai dur ka