aalam-e-wajd se iqrar mein aata hua main

ālam-e-vajd se iqrār meñ aatā huā maiñ

qissa-e-dard banā ḳhvāb sunātā huā maiñ

mansab-e-dār pe aayā huuñ baḌī shaan ke saath

hākim-e-shahr tire hosh uḌātā huā maiñ

zindagī hijr hai aur hijr bhī aisā hai ki bas

saañs tak haar chukā vasl kamātā huā maiñ

chāndnī raat meñ dariyā sī ravāñ yaad ke saath

kaif o mastī meñ chalā jhūmtā gaatā huā maiñ

yaar dekho to kabhī mausam-e-hijrāñ meñ idhar

ḳhaak hotā huuñ yahāñ dasht sajātā huā maiñ

shāḳh-e-imkāñ se tirī yaad kī mahkār chunūñ

ek bhañvrā sā tirī or ko jaatā huā maiñ

halqa-e-sher se guzrūñgā mohabbat meñ 'sa.īd'

dil ke jazbāt ko alfāz meñ laatā huā maiñ

aalam-e-wajd se iqrar mein aata hua main

qissa-e-dard bana KHwab sunata hua main

mansab-e-dar pe aaya hun baDi shan ke sath

hakim-e-shahr tere hosh uData hua main

zindagi hijr hai aur hijr bhi aisa hai ki bas

sans tak haar chuka wasl kamata hua main

chandni raat mein dariya si rawan yaad ke sath

kaif o masti mein chala jhumta gata hua main

yar dekho to kabhi mausam-e-hijran mein idhar

KHak hota hun yahan dasht sajata hua main

shaKH-e-imkan se teri yaad ki mahkar chunun

ek bhanwra sa teri or ko jata hua main

halqa-e-sher se guzrunga mohabbat mein 'said'

dil ke jazbaat ko alfaz mein lata hua main