aam mauqon pe na aankhon mein ubhaare aansu

aam mauqoñ pe na āñkhoñ meñ ubhāre aañsū

hijr jis se bhī ho par tujh pe hī vaare aañsū

zabt kā hai jo hunar maiñ ne diyā hai tum ko

merī āñkhoñ se nikalte haiñ tumhāre aañsū

kyoñ na ab hijr ko maiñ ibtidā-e- vasl kahūñ

aañkh se maiñ ne qabā jaise utāre aañsū

dūsre ishq kī sūrat nahīñ dekhī jaatī

dhundhle kar dete haiñ āñkhoñ ke nazāre aañsū

aañkh kī jhiil sukhātī hai tirī shab kī dhuup

marne lagte haiñ vahāñ pyaas ke maare aañsū

bin tere āñkhoñ ko sahrā na banā baiThūñ maiñ

rote rote na gañvā duuñ kahīñ saare aañsū

mujh farebī ko jo tū ne ye mohabbat dī hai

aañkh se girte haiñ ab sharm ke maare aañsū

raat hotī hai to uThtī haiñ ziyāda lahreñ

aur aa jaate haiñ palkoñ ke kināre aañsū

aam mauqon pe na aankhon mein ubhaare aansu

hijr jis se bhi ho par tujh pe hi ware aansu

zabt ka hai jo hunar main ne diya hai tum ko

meri aankhon se nikalte hain tumhaare aansu

kyon na ab hijr ko main ibtida-e- wasl kahun

aankh se main ne qaba jaise utare aansu

dusre ishq ki surat nahin dekhi jati

dhundhle kar dete hain aankhon ke nazare aansu

aankh ki jhil sukhati hai teri shab ki dhup

marne lagte hain wahan pyas ke mare aansu

bin tere aankhon ko sahra na bana baiThun main

rote rote na ganwa dun kahin sare aansu

mujh farebi ko jo tu ne ye mohabbat di hai

aankh se girte hain ab sharm ke mare aansu

raat hoti hai to uThti hain ziyaada lahren

aur aa jate hain palkon ke kinare aansu