aamal-e-kaj karenge taaqub qubur tak

a.amāl-e-kaj kareñge ta.āqub qubūr tak

pīchhā na us ke ba.ad bhī chhoḌeñge duur tak

kuchh aur jaag lene de ai shām-e-zindagī

sonā hai is ke ba.ad to sub.h-e-nushūr tak

apnā vahī savāl thā us kā vahī javāb

kyā kyā na koh dekhe himāla se tuur tak

guzregā kaise kaise madārij se kyā ḳhabar

lambā safar hai ḳhaak ke zarre kā nuur tak

ġhāfil haiñ is qadar ki guzartā hai ye gumān

ham ko jagā na pā.egī āvāz-e-sūr tak

'bāsir' kahāñ haiñ roz ke vo ham-safar mire

ḳhālī paḌī huī hai saḌak duur duur tak

aamal-e-kaj karenge taaqub qubur tak

pichha na us ke baad bhi chhoDenge dur tak

kuchh aur jag lene de ai sham-e-zindagi

sona hai is ke baad to subh-e-nushur tak

apna wahi sawal tha us ka wahi jawab

kya kya na koh dekhe himala se tur tak

guzrega kaise kaise madarij se kya KHabar

lamba safar hai KHak ke zarre ka nur tak

ghafil hain is qadar ki guzarta hai ye guman

hum ko jaga na paegi aawaz-e-sur tak

'basir' kahan hain roz ke wo ham-safar mere

KHali paDi hui hai saDak dur dur tak