aane aTak aTak ke lagi sans raat se

aane aTak aTak ke lagī saañs raat se

ab hai umiid sirf ḳhudā hī kī zaat se

saaqī havā-e-sard ko tū sarsarī na jaan

kaifiyyat us kī pūchh nabāt-e-nabāt se

apnā sanam vo qahr hai ai barhaman ki gar

dekhe manāt ko to girā deve laat se

kal se to iḳhtilāt meñ taaza hai iḳhtirā.a

rukne lagī haiñ aap mirī baat baat se

pesh aa.iye ba-shafqat-o-lutf us se shaiḳh jī

bint-ul-anab ko jāniye apne nabāt se

hāsil kiyā jo ham ne qadam-bos-e-pīr-e-dair

aa.ī sadā-e-ishq dar-e-somnāt se

haiñ vājib-ul-vajūd ke anvār ishq meñ

us kī sifāt-e-zāt nahīñ mumkināt se

ash.ār-e-tab.a-zād mirī sun ke shoḳh vo

kahne lagā ki fā.eda is mohmalāt se

mutlaq milā ke aañkh idhar dekhte nahīñ

aate nazar ho aaj bhī kam iltifāt se

'inshā' ne aa lagā hī liyā tum ko baat meñ

zālim vo cūktā hai koī apnī ghaat se

aane aTak aTak ke lagi sans raat se

ab hai umid sirf KHuda hi ki zat se

saqi hawa-e-sard ko tu sarsari na jaan

kaifiyyat us ki puchh nabaat-e-nabaat se

apna sanam wo qahr hai ai barhaman ki gar

dekhe manat ko to gira dewe lat se

kal se to iKHtilat mein taza hai iKHtiraa

rukne lagi hain aap meri baat baat se

pesh aaiye ba-shafqat-o-lutf us se shaiKH ji

bint-ul-anab ko jaaniye apne nabaat se

hasil kiya jo hum ne qadam-bos-e-pir-e-dair

aai sada-e-ishq dar-e-somnat se

hain wajib-ul-wajud ke anwar ishq mein

us ki sifat-e-zat nahin mumkinat se

ashaar-e-taba-zad meri sun ke shoKH wo

kahne laga ki faeda is mohmalat se

mutlaq mila ke aankh idhar dekhte nahin

aate nazar ho aaj bhi kam iltifat se

'insha' ne aa laga hi liya tum ko baat mein

zalim wo cukta hai koi apni ghat se