aankh Dale na falak se mah-e-taban munh par

aañkh Daale na falak se mah-e-tābāñ muñh par

rakh lo phūloñ ke evaz zulf kā dāmāñ muñh par

naaz se aap jo chun leñ kahīñ afshāñ muñh par

saaf raushan nazar aa jaa.eñ charāġhāñ muñh par

aaj gesū nahīñ lahrāte haiñ ai jaañ muñh par

tum ne biThlā.e haiñ ye af.ī-e-pechāñ muñh par

piiTh pīchhe mire haq meñ to haiñ kaḌve kalime

mīThī bāteñ na karo ai shah-e-ḳhūbāñ muñh par

dast-e-jānāñ kī adā.eñ jo kare dast-e-junūñ

noch kar pheñk de dāmān-o-girebāñ muñh par

sāya-e-zulf nahīñ yaar ruḳh-e-raushan par

sub.h rāhat kī hai shām-e-ġham-e-hijrāñ muñh par

zikr jo aap ke pīchhe hai vahī aage hai

jhuuT kahte nahīñ hargiz kabhī insāñ muñh par

ġhā.ebāna jo koī be-adabī ho mujh se

kījiyegā na bayāñ us kā mirī jaañ muñh par

sach na samjho use jo tum ko koī jhuuT kahe

ḳhaak paḌtī nahīñ mahtāb ke ai jaañ muñh par

sach na samjho use jo tum ko koī jhuuT kahe

ḳhaak paḌtī nahīñ mahtāb ke ai jaañ muñh par

ganj se maar kī hotī hai hamesha ulfat

kyā huā aa ga.ī gar zulf-e-pareshāñ muñh par

aabrū merī baḌhe ġhair hoñ pānī-pānī

āb-e-ḳhanjar jo paḌe ai dil-e-nādāñ muñh par

surḳh-rūī kī tamanna meñ hamesha qātil

teġh maltī hai tirī ḳhūn-e-shahīdāñ muñh par

bosa-e-rū-e-munavvar kī havas be-jā hai

maar baiTheñ na kahīñ gesu-e-pechāñ muñh par

sahar-e-vasl kā kuchh kījiye mujh se va.ada

hai udāsī kī tarah shām-e-ġharībāñ muñh par

surḳh-rū gardan-e-bismil kī tarah ho jā.ūñ

de koī zaḳhm agar ḳhanjar-e-burrāñ muñh par

kyoñ na ho jumbish-e-abrū meñ ajal āshiq kī

mah-jabīñ rakhtī haiñ shamshīr ko uryāñ muñh par

chashm paidā to kare josh-e-asar naisāñ kā

ham bhī le leñge kabhī gauhar-e-ġhaltāñ muñh par

huuñ vo bulbul maiñ 'shagufta' chaman-e-ālam meñ

muñh kī khaa.e jo chaḌhe murġh-e-ġhazal-ḳhvāñ muñh par

aankh Dale na falak se mah-e-taban munh par

rakh lo phulon ke ewaz zulf ka daman munh par

naz se aap jo chun len kahin afshan munh par

saf raushan nazar aa jaen charaghan munh par

aaj gesu nahin lahraate hain ai jaan munh par

tum ne biThlae hain ye afi-e-pechan munh par

piTh pichhe mere haq mein to hain kaDwe kalime

miThi baaten na karo ai shah-e-KHuban munh par

dast-e-jaanan ki adaen jo kare dast-e-junun

noch kar phenk de daman-o-gireban munh par

saya-e-zulf nahin yar ruKH-e-raushan par

subh rahat ki hai sham-e-gham-e-hijran munh par

zikr jo aap ke pichhe hai wahi aage hai

jhuT kahte nahin hargiz kabhi insan munh par

ghaebana jo koi be-adabi ho mujh se

kijiyega na bayan us ka meri jaan munh par

sach na samjho use jo tum ko koi jhuT kahe

KHak paDti nahin mahtab ke ai jaan munh par

sach na samjho use jo tum ko koi jhuT kahe

KHak paDti nahin mahtab ke ai jaan munh par

ganj se mar ki hoti hai hamesha ulfat

kya hua aa gai gar zulf-e-pareshan munh par

aabru meri baDhe ghair hon pani-pani

aab-e-KHanjar jo paDe ai dil-e-nadan munh par

surKH-rui ki tamanna mein hamesha qatil

tegh malti hai teri KHun-e-shahidan munh par

bosa-e-ru-e-munawwar ki hawas be-ja hai

mar baiThen na kahin gesu-e-pechan munh par

sahar-e-wasl ka kuchh kijiye mujh se wada

hai udasi ki tarah sham-e-ghariban munh par

surKH-ru gardan-e-bismil ki tarah ho jaun

de koi zaKHm agar KHanjar-e-burran munh par

kyon na ho jumbish-e-abru mein ajal aashiq ki

mah-jabin rakhti hain shamshir ko uryan munh par

chashm paida to kare josh-e-asar naisan ka

hum bhi le lenge kabhi gauhar-e-ghaltan munh par

hun wo bulbul main 'shagufta' chaman-e-alam mein

munh ki khae jo chaDhe murgh-e-ghazal-KHwan munh par