aankh ke kunj mein ek dasht-e-tamanna le kar

aañkh ke kunj meñ ik dasht-e-tamannā le kar

ajnabī des ko nikle dil-e-tanhā le kar

dekh to khol ke tārīk makāñ kī khiḌkī

ham tire shahr meñ aa.e haiñ ujālā le kar

ham bhī pahuñche the gulistāñ meñ sukūñ kī ḳhātir

aa ga.e zehn meñ taptā huā sahrā le kar

ab nigāhoñ kī jarāhat ko liye sochte haiñ

kyuuñ ga.e bazm meñ ham zauq-e-tamāshā le kar

kab se fariyād-ba-lab āb-talab hai shīrīñ

aaj farhād bhī niklā nahīñ tesha le kar

rū-siyah tere bane chashm-o-charāg-e-zindāñ

ghuum ab shahr meñ tū chehra-e-zebā le kar

is chakā-chauñd meñ ab mujh ko dikhā.ī kyā de

aa ga.e aap to ik nuur kā dariyā le kar

jab bhī hālāt ke sho.aloñ meñ ghirā huuñ 'betāb'

aa hī pahuñchā hai koī phuul sā chehra le kar

aankh ke kunj mein ek dasht-e-tamanna le kar

ajnabi des ko nikle dil-e-tanha le kar

dekh to khol ke tarik makan ki khiDki

hum tere shahr mein aae hain ujala le kar

hum bhi pahunche the gulistan mein sukun ki KHatir

aa gae zehn mein tapta hua sahra le kar

ab nigahon ki jarahat ko liye sochte hain

kyun gae bazm mein hum zauq-e-tamasha le kar

kab se fariyaad-ba-lab aab-talab hai shirin

aaj farhad bhi nikla nahin tesha le kar

ru-siyah tere bane chashm-o-charag-e-zindan

ghum ab shahr mein tu chehra-e-zeba le kar

is chaka-chaund mein ab mujh ko dikhai kya de

aa gae aap to ek nur ka dariya le kar

jab bhi haalat ke shoalon mein ghira hun 'betab'

aa hi pahuncha hai koi phul sa chehra le kar