aankh kya gham mein tere nam si hui jati hai

aañkh kyā ġham meñ tire nam sī huī jaatī hai

zindagī sho.ala thī shabnam sī huī jaatī hai

badle badle vo nazar aane lage haiñ jab se

un ko paane kī talab kam sī huī jaatī hai

kyā mohabbat hai yahī jab se tujhe dekhā hai

ik ḳhalish siine meñ paiham sī huī jaatī hai

jab se is dil ko ġham-e-yār milā hai yaaro

zindagī aur bhī mohkam sī huī jaatī hai

aaj phir dil ne liyā hai tirī yādoñ kā asar

aaj phir aañkh mirī nam sī huī jaatī hai

mere hāthoñ ne sikhāyā thā sañvarnā jis ko

aaj vo zulf bhī barham sī huī jaatī hai

jab se vo mere tasavvur meñ lage haiñ aane

merī har shaam shab-e-ġham sī huī jaatī hai

jab se ulfat kā asar hone lagā hai us par

us kī hālat bhī 'zafar' ham sī huī jaatī hai

aankh kya gham mein tere nam si hui jati hai

zindagi shoala thi shabnam si hui jati hai

badle badle wo nazar aane lage hain jab se

un ko pane ki talab kam si hui jati hai

kya mohabbat hai yahi jab se tujhe dekha hai

ek KHalish sine mein paiham si hui jati hai

jab se is dil ko gham-e-yar mila hai yaro

zindagi aur bhi mohkam si hui jati hai

aaj phir dil ne liya hai teri yaadon ka asar

aaj phir aankh meri nam si hui jati hai

mere hathon ne sikhaya tha sanwarna jis ko

aaj wo zulf bhi barham si hui jati hai

jab se wo mere tasawwur mein lage hain aane

meri har sham shab-e-gham si hui jati hai

jab se ulfat ka asar hone laga hai us par

us ki haalat bhi 'zafar' hum si hui jati hai