aankh mangi to mujhe de diya dariya usne

aañkh māñgī to mujhe de diyā dariyā us ne

hoñT māñge to diyā pyaas kā sahrā us ne

bistar-e-ḳhvāb pe ārām kī ḳhvāhish thī bahut

tohfa-e-dard-e-mohabbat se navāzā us ne

zindagī bhar ke liye rizq mirā band kiyā

sabr kā de ke mujhe ek nivālā us ne

baat tanhā.ī se karne kā diyā izn mujhe

bazm-e-ahbāb meñ ḳhāmosh biThāyā us ne

chand sāñsoñ kā jahāñ ḳhalq kiyā mere liye

quvvat-e-bāzū-o-par de ke uḌāyā us ne

chāhtā thā ki har ik fan meñ mukammal ho jā.ūñ

maiñ jo girne lagā mujh ko na sañbhālā us ne

kū-ba-kū phirte rahe naḳhl-e-junūñ mil na sakā

shahr-e-idrāk meñ barsoñ to ghumāyā us ne

maiñ ne dekhā nahīñ ehsās huā hai mujh ko

khol rakkhā hai mire ghar meñ darīcha us ne

vaqt ke saath huā jaatā hai gahrā ye savāl

kyoñ dikhāyā thā chamaktā huā taarā us ne

us ke chehre kī tilāvat se na ġhāfil ho jā.ūñ

is liye aa.ina hāthoñ se girāyā us ne

zindagī jaise guzarnī thī vo guzrī 'yāvar'

gul-sifat ḳhvāb mujhe roz dikhāyā us ne

aankh mangi to mujhe de diya dariya us ne

honT mange to diya pyas ka sahra us ne

bistar-e-KHwab pe aaram ki KHwahish thi bahut

tohfa-e-dard-e-mohabbat se nawaza us ne

zindagi bhar ke liye rizq mera band kiya

sabr ka de ke mujhe ek niwala us ne

baat tanhai se karne ka diya izn mujhe

bazm-e-ahbab mein KHamosh biThaya us ne

chand sanson ka jahan KHalq kiya mere liye

quwwat-e-bazu-o-par de ke uDaya us ne

chahta tha ki har ek fan mein mukammal ho jaun

main jo girne laga mujh ko na sanbhaala us ne

ku-ba-ku phirte rahe naKHl-e-junun mil na saka

shahr-e-idrak mein barson to ghumaya us ne

main ne dekha nahin ehsas hua hai mujh ko

khol rakkha hai mere ghar mein daricha us ne

waqt ke sath hua jata hai gahra ye sawal

kyon dikhaya tha chamakta hua tara us ne

us ke chehre ki tilawat se na ghafil ho jaun

is liye aaina hathon se giraya us ne

zindagi jaise guzarni thi wo guzri 'yawar'

gul-sifat KHwab mujhe roz dikhaya us ne