aankh mein aansu labon par aah dil mein dard hai

aañkh meñ aañsū laboñ par aah dil meñ dard hai

tere saudā.ī kī nazroñ meñ to duniyā gard hai

ik jhalak dekhī thī us ne un kī auj-e-charḳh par

rashk se mahtāb kā chehra abhī tak zard hai

ḳhush-nasībān-e-rah-e-ulfat to manzil pā ga.e

apne hisse meñ jo aa.ī vo safar kī gard hai

merī barbādī ne un ko aur rusvā kar diyā

ab to duniyā kah rahī hai vo baḌā be-dard hai

ibtidā-e-ishq kī vo garmī-e-lazzat kahāñ

ik zamāna ho gayā ye aag bilkul sard hai

us kī chhoḌo tum na bhaTko mulkoñ mulkoñ pyaar meñ

'soz' to rusvā hai dīvāna hai kūcha-gard hai

aankh mein aansu labon par aah dil mein dard hai

tere saudai ki nazron mein to duniya gard hai

ek jhalak dekhi thi us ne un ki auj-e-charKH par

rashk se mahtab ka chehra abhi tak zard hai

KHush-nasiban-e-rah-e-ulfat to manzil pa gae

apne hisse mein jo aai wo safar ki gard hai

meri barbaadi ne un ko aur ruswa kar diya

ab to duniya kah rahi hai wo baDa be-dard hai

ibtida-e-ishq ki wo garmi-e-lazzat kahan

ek zamana ho gaya ye aag bilkul sard hai

us ki chhoDo tum na bhaTko mulkon mulkon pyar mein

'soz' to ruswa hai diwana hai kucha-gard hai