aankh meri ulaT gai hogi

aañkh merī ulaT ga.ī hogī

ḳhvāb kī umr ghaT ga.ī hogī

maañg se ḳhuun bah rahā hogā

ḳhaak se zulf aT ga.ī hogī

ruuh apne safar pe niklī jab

tan se miTTī chimaT ga.ī hogī

āḳhirī baat darmiyāñ hī thī

aur phir kaal kaT ga.ī hogī

yā ziyāda qarīb thā vo shaḳhs

yā zamīñ hī simaT ga.ī hogī

hijr kī shab ko jab koī na milā

mujh se aa kar lipaT ga.ī hogī

chal paḌī sub.h kī taraf jab maiñ

raah se raat haT ga.ī hogī

tum mirā chehra dekhne aanā

raushnī jab palaT ga.ī hogī

dukh agar the mire tavīl bahut

to ḳhushī do minute ga.ī hogī

jab koī qahqaha nahīñ hogā

'sa.adiya' dukh meñ baT ga.ī hogī

aankh meri ulaT gai hogi

KHwab ki umr ghaT gai hogi

mang se KHun bah raha hoga

KHak se zulf aT gai hogi

ruh apne safar pe nikli jab

tan se miTTi chimaT gai hogi

aaKHiri baat darmiyan hi thi

aur phir kal kaT gai hogi

ya ziyaada qarib tha wo shaKHs

ya zamin hi simaT gai hogi

hijr ki shab ko jab koi na mila

mujh se aa kar lipaT gai hogi

chal paDi subh ki taraf jab main

rah se raat haT gai hogi

tum mera chehra dekhne aana

raushni jab palaT gai hogi

dukh agar the mere tawil bahut

to KHushi do minute gai hogi

jab koi qahqaha nahin hoga

'sadiya' dukh mein baT gai hogi