aankh se ashk kyon bahen charKH pe jae aah kyon

aañkh se ashk kyoñ baheñ charḳh pe jaa.e aah kyoñ

faash kare jo rāz-e-dil vo ho mirī nigāh kyoñ

kaisī masal ġhalat hai ye dil ko ho dil se raah kyoñ

tum pe zamāna shefta tum ko kisī se chaah kyoñ

jo ho muqayyad-e-adā terā vo qaul kis liye

jis meñ jagah kī qaid ho terī vo jalva-gāh kyoñ

ġhair ne bad-gumāñ kiyā maiñ ne ġhalat kahā bajā

merā hī dil sahī magar merā vo ḳhair-ḳhvāh kyoñ

qābil-e-bāz-purs haiñ merī hī saḳht-jāniyāñ

haa.e ye maurid-e-itāb ḳhanjar-e-be-gunāh kyoñ

saarī ḳhudā.ī ke liye jabki vo bazm aam hai

mujh pe hai pāsbān-e-dard dīda-e-intibāh kyoñ

koī alam agar nahīñ phir ye 'munīr' kis liye

aañkh meñ ashk dil pe haath lab pe ye aah aah kyoñ

aankh se ashk kyon bahen charKH pe jae aah kyon

fash kare jo raaz-e-dil wo ho meri nigah kyon

kaisi masal ghalat hai ye dil ko ho dil se rah kyon

tum pe zamana shefta tum ko kisi se chah kyon

jo ho muqayyad-e-ada tera wo qaul kis liye

jis mein jagah ki qaid ho teri wo jalwa-gah kyon

ghair ne bad-guman kiya main ne ghalat kaha baja

mera hi dil sahi magar mera wo KHair-KHwah kyon

qabil-e-baz-purs hain meri hi saKHt-jaaniyan

hae ye maurid-e-itab KHanjar-e-be-gunah kyon

sari KHudai ke liye jabki wo bazm aam hai

mujh pe hai pasban-e-dard dida-e-intibah kyon

koi alam agar nahin phir ye 'munir' kis liye

aankh mein ashk dil pe hath lab pe ye aah aah kyon