aankh thi suji hui aur raat bhar soya na tha

aañkh thī suujī huī aur raat bhar soyā na thā

is tarah vo TuuT kar shāyad kabhī royā na thā

un ke shauq-e-dīd meñ thā is qadr khoyā huā

maiñ bharī mahfil meñ thā aisā ki maiñ goyā na thā

imtihāñ zauq-e-safar kā thā to sūraj sar pe thā

dhuup thī dīvār thī lekin kahīñ saaya na thā

vo baḌā thā phir bhī vo is qadr be-faiz thā

us ghanere peḌ meñ jaise koī saaya na thā

shāhrāh par ḳhuun meñ ik laash thī luthḌī hui

aa.e din kā hādsa thā is liye charchā na thā

har nigah pyāsī thī lekin vaqt kī tahvīl meñ

ik sarāb-āsā zamīñ thī duur tak dariyā na thā

aankh thi suji hui aur raat bhar soya na tha

is tarah wo TuT kar shayad kabhi roya na tha

un ke shauq-e-did mein tha is qadr khoya hua

main bhari mahfil mein tha aisa ki main goya na tha

imtihan zauq-e-safar ka tha to suraj sar pe tha

dhup thi diwar thi lekin kahin saya na tha

wo baDa tha phir bhi wo is qadr be-faiz tha

us ghanere peD mein jaise koi saya na tha

shahrah par KHun mein ek lash thi luthDi hui

aae din ka hadsa tha is liye charcha na tha

har nigah pyasi thi lekin waqt ki tahwil mein

ek sarab-asa zamin thi dur tak dariya na tha