aankh uTThegi to diwana girega

aañkh uTThegī to dīvāna giregā

jhiil dekhe se koī pyāsā giregā

aaj 'uryānī khulegī shāḳh-e-gul kī

aaj kī shab āḳhirī pattā giregā

raat bhar ThiThure kisī ke 'ahd par ham

kyā ḳhabar thī is qadar paara giregā

TūTte rishte na shaa.e hoñ kahīñ so

khiḌkiyoñ par be-vaj.h parda giregā

aaj jo kuchlā gayā būToñ ke nīche

aañkh meñ ik din yahī zarra giregā

bādshāhoñ ko koī ḳhatra nahīñ hai

had se had hogā ki ik pyāda giregā

ḳhuld se aadam zamīñ tak aa gayā hai

kyā pata ab aur ye kitnā giregā

aankh uTThegi to diwana girega

jhil dekhe se koi pyasa girega

aaj 'uryani khulegi shaKH-e-gul ki

aaj ki shab aaKHiri patta girega

raat bhar ThiThure kisi ke 'ahd par hum

kya KHabar thi is qadar para girega

TuTte rishte na shae hon kahin so

khiDkiyon par be-wajh parda girega

aaj jo kuchla gaya buTon ke niche

aankh mein ek din yahi zarra girega

baadshahon ko koi KHatra nahin hai

had se had hoga ki ek pyaada girega

KHuld se aadam zamin tak aa gaya hai

kya pata ab aur ye kitna girega