aankhon aankhon mein mohabbat ka payam aa hi gaya

āñkhoñ āñkhoñ meñ mohabbat kā payām aa hī gayā

marhabā izn-e-vidā-e-nañg-o-nām aa hī gayā

āfiyat ke naam vahshat kā payām aa hī gayā

lo ye afsāna qarīb-e-iḳhtitām aa hī gayā

kam se kam jazb-e-vafā itnā to kaam aa hī gayā

be-irāda un ke lab par merā naam aa hī gayā

shaiḳh kā sab zohd-o-taqvā aaj kaam aa hī gayā

jab vo mīnā-e-ravāñ sahbā ba-jām aa hī gayā

mai-kade meñ jaane kyā kyā gul khilāte shaiḳh-jī

vo to rindoñ ko ḳhayāl-e-ehtirām aa hī gayā

umr-bhar jis ke liye āñkheñ rahī haiñ farsh-e-rāh

vo ajal kā qāsid-e-farḳhanda-gām aa hī gayā

naaz the kyā kyā urūj-e-nayyar-e-iqbāl par

dopahar ke ba.ad dekhā vaqt-e-shām aa hī gayā

alvidā.a ai zo.am-e-hastī al-firāq ai vahm-e-zīst

maut ban kar muzhda-e-umr-e-davām aa hī gayā

zabt-e-rāz-e-ġham pe sau jāneñ bhī kar dete nisār

kyā batā.eñ bas zabāñ par un kā naam aa hī gayā

husn ne bhī karvaTeñ badlī haiñ ai dil rāt-bhar

terī peshānī se dāġh-e-nañg-e-ḳhām aa hī gayā

jab kahīñ lutf-e-suḳhan kī baat aa.ī hai 'rashīd'

e.atibārul-mulk kā har lab pe naam aa hī gayā

aankhon aankhon mein mohabbat ka payam aa hi gaya

marhaba izn-e-wida-e-nang-o-nam aa hi gaya

aafiyat ke nam wahshat ka payam aa hi gaya

lo ye afsana qarib-e-iKHtitam aa hi gaya

kam se kam jazb-e-wafa itna to kaam aa hi gaya

be-irada un ke lab par mera nam aa hi gaya

shaiKH ka sab zohd-o-taqwa aaj kaam aa hi gaya

jab wo mina-e-rawan sahba ba-jam aa hi gaya

mai-kade mein jaane kya kya gul khilate shaiKH-ji

wo to rindon ko KHayal-e-ehtiram aa hi gaya

umr-bhar jis ke liye aankhen rahi hain farsh-e-rah

wo ajal ka qasid-e-farKHanda-gam aa hi gaya

naz the kya kya uruj-e-nayyar-e-iqbaal par

dopahar ke baad dekha waqt-e-sham aa hi gaya

alwidaa ai zoam-e-hasti al-firaq ai wahm-e-zist

maut ban kar muzhda-e-umr-e-dawam aa hi gaya

zabt-e-raaz-e-gham pe sau jaanen bhi kar dete nisar

kya bataen bas zaban par un ka nam aa hi gaya

husn ne bhi karwaTen badli hain ai dil raat-bhar

teri peshani se dagh-e-nang-e-KHam aa hi gaya

jab kahin lutf-e-suKHan ki baat aai hai 'rashid'

eatibarul-mulk ka har lab pe nam aa hi gaya