aankhon ke charagh warte hain

āñkhoñ ke charāġh vārte haiñ

aa terī nazar utārte haiñ

chullū bhar ḳhuun bhiik mil jaa.e

ham kāsa-e-sar pasārte haiñ

rakhte nahīñ saada safha-e-dil

nāḳhūn ke naqsh ubhārte haiñ

har raat difā-e-shahr-e-jāñ ko

haarī huī fauj utārte haiñ

mehnat se basā diyā hai sahrā

ab ghar kī taraf sidhārte haiñ

bante haiñ lakīreñ kaalī niilī

kāġhaz kī jabīñ siñghārte haiñ

rotā hai koī kisī ke ġham meñ

sab apne hī dukh bichārte haiñ

jaisī ki guzar rahī hai 'ḳhusrav'

kuchh is se alag guzārte haiñ

aankhon ke charagh warte hain

aa teri nazar utarte hain

chullu bhar KHun bhik mil jae

hum kasa-e-sar pasarte hain

rakhte nahin sada safha-e-dil

naKHun ke naqsh ubhaarte hain

har raat difa-e-shahr-e-jaan ko

haari hui fauj utarte hain

mehnat se basa diya hai sahra

ab ghar ki taraf sidhaarte hain

bante hain lakiren kali nili

kaghaz ki jabin singhaarte hain

rota hai koi kisi ke gham mein

sab apne hi dukh bichaarte hain

jaisi ki guzar rahi hai 'KHusraw'

kuchh is se alag guzarte hain