aankhon ko kisi haal mein giryan na karenge

āñkhoñ ko kisī haal meñ giryāñ na kareñge

ham ishq kī tauhīn kā sāmāñ na kareñge

jo apnā samajh kar hameñ baḳhshā hai kisī ne

us dard kā bhūle se bhī darmāñ na kareñge

hañs hañs ke sahe jā.eñge har jaur-e-mohabbat

shikvoñ se magar tum ko pashemāñ na kareñge

rusvā.ī-e-vahshat hameñ manzūr nahīñ hai

phūloñ kī tarah chaak girebāñ na kareñge

maujoñ se zarā khelnā aa jaane do ham ko

phir ham kabhī andesha-e-tūfāñ na kareñge

ab ho gayā ehsās hameñ azmat-e-ġham kā

ab ārzū-e-aish-e-farāvāñ na kareñge

gul aur hī kuchh fasl-e-bahārāñ ne khilā.e

ab phir se tamannā-e-bahārāñ na kareñge

rakkheñge yūñhī dil ko tapāñ ishq meñ 'manshā'

jab tak use tanvīr-badāmāñ na kareñge

aankhon ko kisi haal mein giryan na karenge

hum ishq ki tauhin ka saman na karenge

jo apna samajh kar hamein baKHsha hai kisi ne

us dard ka bhule se bhi darman na karenge

hans hans ke sahe jaenge har jaur-e-mohabbat

shikwon se magar tum ko pasheman na karenge

ruswai-e-wahshat hamein manzur nahin hai

phulon ki tarah chaak gireban na karenge

maujon se zara khelna aa jaane do hum ko

phir hum kabhi andesha-e-tufan na karenge

ab ho gaya ehsas hamein azmat-e-gham ka

ab aarzu-e-aish-e-farawan na karenge

gul aur hi kuchh fasl-e-bahaaran ne khilae

ab phir se tamanna-e-bahaaran na karenge

rakkhenge yunhi dil ko tapan ishq mein 'mansha'

jab tak use tanwir-badaman na karenge