aankhon mein apni ashk-e-nadamat liye hue

āñkhoñ meñ apnī ashk-e-nadāmat liye hue

ham haiñ ajiib rang-e-ibādat liye hue

dozaḳh liye hue kahīñ jannat liye hue

har chiiz hai vo hasb-e-zarūrat liye hue

shauq-e-gunāh kam hai na ḳhauf-e-ḳhudā hai kam

donoñ hī chaar din kī haiñ mohlat liye hue

baiTho na yuuñ ki paañv se chhin jaa.e ye zamīñ

sar par khaḌā hai koī qayāmat liye hue

afsos se ġharaz na koī ḳhauf hai use

vo aadmī hai kaisī karāmat liye hue

hijrat koī dayār-e-haqīqat se kar gayā

ḳhvāboñ ke shahr meñ hai sukūnat liye hue

maiñ chāhtā thā us ko ijāzat na duuñ magar

vo chal paḌā baġhair ijāzat liye hue

aankhon mein apni ashk-e-nadamat liye hue

hum hain ajib rang-e-ibaadat liye hue

dozaKH liye hue kahin jannat liye hue

har chiz hai wo hasb-e-zarurat liye hue

shauq-e-gunah kam hai na KHauf-e-KHuda hai kam

donon hi chaar din ki hain mohlat liye hue

baiTho na yun ki panw se chhin jae ye zamin

sar par khaDa hai koi qayamat liye hue

afsos se gharaz na koi KHauf hai use

wo aadmi hai kaisi karamat liye hue

hijrat koi dayar-e-haqiqat se kar gaya

KHwabon ke shahr mein hai sukunat liye hue

main chahta tha us ko ijazat na dun magar

wo chal paDa baghair ijazat liye hue