aankhon mein ek KHwab pas-e-KHwab aur hai

āñkhoñ meñ ek ḳhvāb pas-e-ḳhvāb aur hai

ik mauj-e-tund-o-tez tah-e-āb aur hai

un se bhī merī dostī un se bhī ranjisheñ

siine meñ ek halqa-e-ahbāb aur hai

shāyad kabhī khule ye mire naġhma-gar pe bhī

ye sāz-e-jism aur hai mizrāb aur hai

chaliye kahīñ zamīñ kī kashish kuchh to kam huī

ḳhushkī pe jism aur tah-e-āb aur hai

phir aa na jaa.e lauT ke ye zalzala abhī

jo aa ke tham gayā thā vo sailāb aur hai

is aa.ine pe gard ke chehre miTā ke bhī

miTTī kā ek naqsh pas-e-āb aur hai

itnī siyāh-rāt meñ itnī sī raushnī

ye chāñd vo nahīñ mirā mahtāb aur hai

aankhon mein ek KHwab pas-e-KHwab aur hai

ek mauj-e-tund-o-tez tah-e-ab aur hai

un se bhi meri dosti un se bhi ranjishen

sine mein ek halqa-e-ahbab aur hai

shayad kabhi khule ye mere naghma-gar pe bhi

ye saz-e-jism aur hai mizrab aur hai

chaliye kahin zamin ki kashish kuchh to kam hui

KHushki pe jism aur tah-e-ab aur hai

phir aa na jae lauT ke ye zalzala abhi

jo aa ke tham gaya tha wo sailab aur hai

is aaine pe gard ke chehre miTa ke bhi

miTTi ka ek naqsh pas-e-ab aur hai

itni siyah-raat mein itni si raushni

ye chand wo nahin mera mahtab aur hai