aankhon mein hain haqir jis-tis ke

āñkhoñ meñ haiñ haqīr jis-tis ke

nazroñ se gir ga.e haiñ ham kis ke

dil kā hamdam ilaaj mat kar ab

zaḳhm marham-pazīr haiñ is ke

kaun aatā hai aisā hosh-rubā

sabr o tāqat yahāñ se kyuuñ khiske

dekhtī hai ye kis kī āñkhoñ ko

kyuuñ khule haiñ ye chashm nargis ke

bas kahīñ thak bhī āsiyā-e-falak

ho chuke surma ham to ab pis ke

jī se rahte haiñ apne us pe nisār

dil se hote haiñ dost ham jis ke

go nahīñ ab kabhī to ai pyāre

ham bhī the yaar terī majlis ke

tū to ḳhush hai ki tere kūche meñ

ek taḌpā kare aur ik siske

mar ga.e par bhī ye 'hasan' na muñde

muntazir chashm the tire kis ke

aankhon mein hain haqir jis-tis ke

nazron se gir gae hain hum kis ke

dil ka hamdam ilaj mat kar ab

zaKHm marham-pazir hain is ke

kaun aata hai aisa hosh-ruba

sabr o taqat yahan se kyun khiske

dekhti hai ye kis ki aankhon ko

kyun khule hain ye chashm nargis ke

bas kahin thak bhi aasiya-e-falak

ho chuke surma hum to ab pis ke

ji se rahte hain apne us pe nisar

dil se hote hain dost hum jis ke

go nahin ab kabhi to ai pyare

hum bhi the yar teri majlis ke

tu to KHush hai ki tere kuche mein

ek taDpa kare aur ek siske

mar gae par bhi ye 'hasan' na munde

muntazir chashm the tere kis ke