aankhon mein jo hamari ye jalon ke dagh hain

āñkhoñ meñ jo hamārī ye jāloñ ke daaġh haiñ

ye to hamāre apne ḳhayāloñ ke daaġh haiñ

merī hatheliyoñ pe jo mehñdī se rach ga.e

ye āñsuoñ meñ bhīge rumāloñ ke daaġh haiñ

bāhar nikal ke jism se jā.ūñ to kis tarah

sāñkal kahīñ kahīñ pe ye tāloñ ke daaġh haiñ

tum jin ko kah rahe ho mire qadmoñ ke nishāñ

vo sab to mere paañv ke chhāloñ ke daaġh haiñ

kājal meñ ghul ke aur ziyāda nikhar ga.e

ashkoñ ko ye na kahnā ḳhayāloñ ke daaġh haiñ

hal hote hote us kī natīje pe aa ga.e

jitne javāb haiñ vo savāloñ ke daaġh haiñ

aate hī mere paas jo aksar chhalak paḌe

hoñToñ pe mere aise hī pyāloñ ke daaġh haiñ

aise bhī log haiñ jo sitāroñ ko dekh kar

kahte mileñ haiñ ye to ujāloñ ke daaġh haiñ

jo mujh meñ dekhte haiñ mire bhī haiñ ai 'kuñvar'

kuchh un meñ mujh ko dekhne vāloñ ke daaġh haiñ

aankhon mein jo hamari ye jalon ke dagh hain

ye to hamare apne KHayalon ke dagh hain

meri hatheliyon pe jo mehndi se rach gae

ye aansuon mein bhige rumalon ke dagh hain

bahar nikal ke jism se jaun to kis tarah

sankal kahin kahin pe ye talon ke dagh hain

tum jin ko kah rahe ho mere qadmon ke nishan

wo sab to mere panw ke chhaalon ke dagh hain

kajal mein ghul ke aur ziyaada nikhar gae

ashkon ko ye na kahna KHayalon ke dagh hain

hal hote hote us ki natije pe aa gae

jitne jawab hain wo sawalon ke dagh hain

aate hi mere pas jo aksar chhalak paDe

honTon pe mere aise hi pyalon ke dagh hain

aise bhi log hain jo sitaron ko dekh kar

kahte milen hain ye to ujalon ke dagh hain

jo mujh mein dekhte hain mere bhi hain ai 'kunwar'

kuchh un mein mujh ko dekhne walon ke dagh hain