aankhon mein teri nur-e-sahar chhoD jaunga

āñkhoñ meñ terī nūr-e-sahar chhoḌ jā.ūñgā

maiñ zulmatoñ meñ shams-o-qamar chhoḌ jā.ūñgā

mujh ko talāsh kartī rahe tujh meñ kā.enāt

yādoñ kā apnī aisā asar chhoḌ jā.ūñgā

dekhegā tū har ek ko merī nigāh se

terī nazar meñ apnī nazar chhoḌ jā.ūñgā

mujh ko na kar sakegā farāmosh tū kabhī

jiine kā maiñ to mar ke hunar chhoḌ jā.ūñgā

phūTegī tīrgī se mohabbat kī raushnī

dāman meñ shaam ke meñ sahar chhoḌ jā.ūñgā

mar kar bhī tere jism meñ zinda rahūñgā maiñ

terī ragoñ meñ ḳhūn-e-jigar chhoḌ jā.ūñgā

ḳhuuñ meñ mire chhupā hai ḳhazāna hayāt kā

maiñ jaate jaate la.al-o-gohar chhoḌ jā.ūñgā

'tauqīr' mehmān huuñ maiñ apne jism meñ

jis ghar meñ rah rahā huuñ vo ghar chhoḌ jā.ūñgā

aankhon mein teri nur-e-sahar chhoD jaunga

main zulmaton mein shams-o-qamar chhoD jaunga

mujh ko talash karti rahe tujh mein kaenat

yaadon ka apni aisa asar chhoD jaunga

dekhega tu har ek ko meri nigah se

teri nazar mein apni nazar chhoD jaunga

mujh ko na kar sakega faramosh tu kabhi

jine ka main to mar ke hunar chhoD jaunga

phuTegi tirgi se mohabbat ki raushni

daman mein sham ke mein sahar chhoD jaunga

mar kar bhi tere jism mein zinda rahunga main

teri ragon mein KHun-e-jigar chhoD jaunga

KHun mein mere chhupa hai KHazana hayat ka

main jate jate lal-o-gohar chhoD jaunga

'tauqir' mehman hun main apne jism mein

jis ghar mein rah raha hun wo ghar chhoD jaunga