aankhon mein zindagi ke tamashe uchhaal kar

āñkhoñ meñ zindagī ke tamāshe uchhāl kar

ai ġhurbat-e-nigāh na itne savāl kar

rahne de āsmān ko ik parda-e-ḳhayāl

lekin zamīñ ko sāya-e-jannat bahāl kar

koī talab nahīñ hai tirī bārgāh se

ham be-ḳhayāl aa.e haiñ itnā ḳhayāl kar

ārām-e-jāñ haiñ ham ko yahī sarsarāhaTeñ

pachhtāne vaale ham nahīñ sāñpoñ ko paal kar

aa rakh de haath sīna-e-ātish-mizāj par

kab tak rakheñge terī amānat sambhāl kar

vo be-zabāñ ġharīb na khā jaa.e koī tiir

be-chain ho gayā huuñ kabūtar uchhāl kar

'ejāz' ab ke surḳh gulāboñ se kaam le

teshe kī aas chhoḌ de patthar ko la.al kar

aankhon mein zindagi ke tamashe uchhaal kar

ai ghurbat-e-nigah na itne sawal kar

rahne de aasman ko ek parda-e-KHayal

lekin zamin ko saya-e-jannat bahaal kar

koi talab nahin hai teri bargah se

hum be-KHayal aae hain itna KHayal kar

aaram-e-jaan hain hum ko yahi sarsarahaTen

pachhtane wale hum nahin sanpon ko pal kar

aa rakh de hath sina-e-atish-mizaj par

kab tak rakhenge teri amanat sambhaal kar

wo be-zaban gharib na kha jae koi tir

be-chain ho gaya hun kabutar uchhaal kar

'ejaz' ab ke surKH gulabon se kaam le

teshe ki aas chhoD de patthar ko lal kar