aankhon se jab ye KHwab sunahre utar gae

āñkhoñ se jab ye ḳhvāb sunahre utar ga.e

ham dil meñ apne aur bhī gahre utar ga.e

sāñpoñ ne man kī biin ko kaaTā hai is tarah

the us ke paas jitne bhī lahre utar ga.e

laa.e haiñ vo hī aag ke motī baTor kar

jo āñsuoñ kī barf meñ gahre utar ga.e

logoñ ke dard-o-ġham bhī siyāsat ke zehn meñ

jhanḌoñ se ek din ko hī phahre utar ga.e

pahre pe sab hī chor haiñ ye tab patā chalā

āñkhoñ se jab ye niiñd ke pahre utar ga.e

ham jab taToñ ke paas rahe Dūbte rahe

jab jab bhañvar ke beach meñ Thahre utar ga.e

na.aroñ kī sīḌhiyoñ ko lagā kar chaḌhe jo log

ho kar unhīñ kī choT se bahre utar ga.e

jis din se mere dil meñ 'kuñvar' bas ga.e haiñ aap

duniyā ke mujh pe jitne the pahre utar ga.e

aankhon se jab ye KHwab sunahre utar gae

hum dil mein apne aur bhi gahre utar gae

sanpon ne man ki bin ko kaTa hai is tarah

the us ke pas jitne bhi lahre utar gae

lae hain wo hi aag ke moti baTor kar

jo aansuon ki barf mein gahre utar gae

logon ke dard-o-gham bhi siyasat ke zehn mein

jhanDon se ek din ko hi phahre utar gae

pahre pe sab hi chor hain ye tab pata chala

aankhon se jab ye nind ke pahre utar gae

hum jab taTon ke pas rahe Dubte rahe

jab jab bhanwar ke beach mein Thahre utar gae

naron ki siDhiyon ko laga kar chaDhe jo log

ho kar unhin ki choT se bahre utar gae

jis din se mere dil mein 'kunwar' bas gae hain aap

duniya ke mujh pe jitne the pahre utar gae