aansuon ne bhi to kar di hai taraf-dari dekh

āñsuoñ ne bhī to kar dī hai taraf-dārī dekh

mujhe mat dekh mirī aañkh kī dushvārī dekh

shaam Dhalte hī charāġhoñ kī tarah jaltī haiñ

ya.anī bas aañkh nahīñ aañkh kī bedārī dekh

maiñ tire hijr meñ hañstā huuñ to hairat kaisī

mujhe mat dekh mirī jaan adā-kārī dekh

maiñ ne alfāz baratne meñ lahū ḳharch kiyā

ab tirā farz hai tū sher kī tahdārī dekh

mere hoñToñ ke tabassum se na andāza lagā

kis qadar māthe pe rakkhī hai shikan bhārī dekh

tere chhūne se mirī nabz bhī ruk jaatī hai

aa mujhe haath lagā aur kalā-kārī dekh

tere kahne ke sabab sochā na manzil ke ta.iiñ

ghar se niklā to abhī tak hai safar jaarī dekh

aansuon ne bhi to kar di hai taraf-dari dekh

mujhe mat dekh meri aankh ki dushwari dekh

sham Dhalte hi charaghon ki tarah jalti hain

yani bas aankh nahin aankh ki bedari dekh

main tere hijr mein hansta hun to hairat kaisi

mujhe mat dekh meri jaan ada-kari dekh

main ne alfaz baratne mein lahu KHarch kiya

ab tera farz hai tu sher ki tahdari dekh

mere honTon ke tabassum se na andaza laga

kis qadar mathe pe rakkhi hai shikan bhaari dekh

tere chhune se meri nabz bhi ruk jati hai

aa mujhe hath laga aur kala-kari dekh

tere kahne ke sabab socha na manzil ke tain

ghar se nikla to abhi tak hai safar jari dekh