aansu pina aur muskana achchha lagta hai

aañsū piinā aur muskānā achchhā lagtā hai

chaTTānoñ se sar Takrānā achchhā lagtā hai

niilī poshākoñ meñ bādal pyāre lagte haiñ

barf-mahal meñ aanā jaanā achchhā lagtā hai

barf ke tode rahte haiñ masrūf sharārat meñ

parbat kā ye khel purānā achchhā lagtā hai

mustaqbil ke manzar-nāme likhtā rahtā huuñ

phir bhī apnā sher purānā achchhā lagtā hai

chāñd ko bāñhoñ meñ bhar kar maiñ hañstā rahtā huuñ

chāñd kahe hai ye dīvānā achchhā lagtā hai

tan ke bāġhīchoñ meñ jab ehsās mahakte haiñ

sūraj kā ugnā Dhal jaanā achchhā lagtā hai

log bulāte haiñ us ko jab mere havāle se

chauñknā us kā aur sharmānā achchhā lagtā hai

jis ke pas-manzar meñ ujlī ujlī dhuup ho koī

aise manzar kā Thukrānā achchhā lagtā hai

sham-e-farozāñ kī sūrat alfāz haiñ 'ḳhālid' jī

lahja ye jānā-pahchānā achchhā lagtā hai

aansu pina aur muskana achchha lagta hai

chaTTanon se sar Takrana achchha lagta hai

nili poshakon mein baadal pyare lagte hain

barf-mahal mein aana jaana achchha lagta hai

barf ke tode rahte hain masruf shararat mein

parbat ka ye khel purana achchha lagta hai

mustaqbil ke manzar-name likhta rahta hun

phir bhi apna sher purana achchha lagta hai

chand ko banhon mein bhar kar main hansta rahta hun

chand kahe hai ye diwana achchha lagta hai

tan ke baghichon mein jab ehsas mahakte hain

suraj ka ugna Dhal jaana achchha lagta hai

log bulate hain us ko jab mere hawale se

chaunkna us ka aur sharmana achchha lagta hai

jis ke pas-manzar mein ujli ujli dhup ho koi

aise manzar ka Thukrana achchha lagta hai

sham-e-farozan ki surat alfaz hain 'KHalid' ji

lahja ye jaana-pahchana achchha lagta hai