aansuon ko apni palkon par saja kar le gaya

āñsuoñ ko apnī palkoñ par sajā kar le gayā

maiñ bhī us mahfil meñ kuchh sham.eñ jalā kar le gayā

ek ek chehre se jo nazreñ bachā kar le gayā

vo bhī kis andāz ke jalve churā kar le gayā

jism merā hai magar maiñ jism meñ huuñ hī nahīñ

ek jhoñkā yaad kā aisā uḌā kar le gayā

aa.ine ke sāmne ik aa.ina lagtā huuñ maiñ

jaane vaalā merī sūrat tak churā kar le gayā

mere dil meñ jazb ho kar rah gayā terā vajūd

tū jise hāsil vo parchhā.ī uThā kar le gayā

kuchh na pūchho tum mirī taḳh.īl kī 'parvāz' ko

bhiiḌ meñ bhī bhiiḌ se dāman bachā kar le gayā

aansuon ko apni palkon par saja kar le gaya

main bhi us mahfil mein kuchh shamen jala kar le gaya

ek ek chehre se jo nazren bacha kar le gaya

wo bhi kis andaz ke jalwe chura kar le gaya

jism mera hai magar main jism mein hun hi nahin

ek jhonka yaad ka aisa uDa kar le gaya

aaine ke samne ek aaina lagta hun main

jaane wala meri surat tak chura kar le gaya

mere dil mein jazb ho kar rah gaya tera wajud

tu jise hasil wo parchhai uTha kar le gaya

kuchh na puchho tum meri taKHil ki 'parwaz' ko

bhiD mein bhi bhiD se daman bacha kar le gaya