aao ye KHamoshi toDen aaine se baat karen

aao ye ḳhāmoshī toḌeñ ā.īne se baat kareñ

thoḌī hairat aañkh meñ bhar leñ thoḌī sī ḳhairāt kareñ

hijr o visāl ke rañg the jitne tārīkī meñ Duub ga.e

tanhā.ī ke manzar meñ ab kaun sā kār-e-hayāt kareñ

dekho is ke baad aa.egī aur añdherī kaalī raat

dhuup ke in TukḌoñ ko chun leñ jam.a yahī zarrāt kareñ

pyāsoñ ke jhurmuT meñ haiñ aur itnā soch rahe haiñ ham

āñkhoñ ke is bojhal-pan ko kaise nahr-e-furāt kareñ

paanī paanī kahne vaale dariyā dariyā Duub ga.e

kis muñh se sāhil vāloñ se tishna-labī kī baat kareñ

aao ye KHamoshi toDen aaine se baat karen

thoDi hairat aankh mein bhar len thoDi si KHairaat karen

hijr o visal ke rang the jitne tariki mein Dub gae

tanhai ke manzar mein ab kaun sa kar-e-hayat karen

dekho is ke baad aaegi aur andheri kali raat

dhup ke in TukDon ko chun len jama yahi zarraat karen

pyason ke jhurmuT mein hain aur itna soch rahe hain hum

aankhon ke is bojhal-pan ko kaise nahr-e-furaat karen

pani pani kahne wale dariya dariya Dub gae

kis munh se sahil walon se tishna-labi ki baat karen