aap bhi nahin aae nind bhi nahin aai

aap bhī nahīñ aa.e niiñd bhī nahīñ aa.ī

nīm-vā darīchoñ se jhāñktī hai tanhā.ī

jaag jaag uThte haiñ gan-kalī ke mīThe sur

chheḌ chheḌ jaatī hai gesuoñ kī purvā.ī

yuuñ mire ḳhayāloñ meñ terī yaad raqsāñ hai

jis tarah fazāoñ meñ gūñjtī hai shahnā.ī

gard-e-rāh bhī chup hai sañg-e-mīl bhī ḳhāmosh

tālibān-e-manzil kī kuchh ḳhabar nahīñ aa.ī

ik taraf ġham-e-duniyā ik taraf tirī yādeñ

aaj kal hayūloñ se khelte haiñ saudā.ī

jin guloñ ne paayā ho rañg-o-bū bagūloñ se

kaun chhīn saktā hai un guloñ kī ra.anā.ī

ye tane tane abrū ye harā-bharā chehrā

ham ne qahr sī lazzat pyaar meñ nahīñ paa.ī

ab to saaf suntā huuñ apne dil kī har dhaḌkan

aur kyā dikhā.egī ye tavīl tanhā.ī

bazm-e-dost meñ 'shahzād' tum bhī kuchh hañso bolo

chup rahe se hotī hai duur duur rusvā.ī

aap bhi nahin aae nind bhi nahin aai

nim-wa darichon se jhankti hai tanhai

jag jag uThte hain gan-kali ke miThe sur

chheD chheD jati hai gesuon ki purwai

yun mere KHayalon mein teri yaad raqsan hai

jis tarah fazaon mein gunjti hai shahnai

gard-e-rah bhi chup hai sang-e-mil bhi KHamosh

taliban-e-manzil ki kuchh KHabar nahin aai

ek taraf gham-e-duniya ek taraf teri yaaden

aaj kal hayulon se khelte hain saudai

jin gulon ne paya ho rang-o-bu bagulon se

kaun chhin sakta hai un gulon ki ranai

ye tane tane abru ye hara-bhara chehra

hum ne qahr si lazzat pyar mein nahin pai

ab to saf sunta hun apne dil ki har dhaDkan

aur kya dikhaegi ye tawil tanhai

bazm-e-dost mein 'shahzad' tum bhi kuchh hanso bolo

chup rahe se hoti hai dur dur ruswai