aap ke jitne mujh pe karam hain main jaanun ya dil jaane hai

aap ke jitne mujh pe karam haiñ maiñ jānūñ yā dil jaane hai

kitnī ḳhushī aur kitne ġham haiñ maiñ jānūñ yā dil jaane hai

ek taraf hai saarā zamāna ik jānib mujh sā dīvāna

kitne sitam bālā-e-sitam haiñ maiñ jānūñ yā dil jaane hai

ahl-e-mohabbat ahl-e-zamāna ġham se pare ho kar chalte haiñ

aaj bhalā kyoñ vaqf-e-alam haiñ maiñ jānūñ yā dil jaane hai

haal mirā jo aaj huā hai koī na samjhe koī na jaane

lab pe tabassum āñkheñ nam haiñ maiñ jānūñ yā dil jaane hai

haa.e vo un kā tarz-e-takallum farmānā bā-mauj-e-tabassum

kal bhī ham the aaj bhī ham haiñ maiñ jānūñ yā dil jaane hai

aap kī ḳhātir jām-o-subū the aap to vaqf-e-rang-o-bū the

aaj magar kyoñ said-e-alam haiñ maiñ jānūñ yā dil jaane hai

'hasrat' kī ġhazloñ ne āḳhir luuT liyā mahfil ko lekin

hazrat kaise ahl-e-qalam haiñ maiñ jānūñ yā dil jaane hai

aap ke jitne mujh pe karam hain main jaanun ya dil jaane hai

kitni KHushi aur kitne gham hain main jaanun ya dil jaane hai

ek taraf hai sara zamana ek jaanib mujh sa diwana

kitne sitam baala-e-sitam hain main jaanun ya dil jaane hai

ahl-e-mohabbat ahl-e-zamana gham se pare ho kar chalte hain

aaj bhala kyon waqf-e-alam hain main jaanun ya dil jaane hai

haal mera jo aaj hua hai koi na samjhe koi na jaane

lab pe tabassum aankhen nam hain main jaanun ya dil jaane hai

hae wo un ka tarz-e-takallum farmana ba-mauj-e-tabassum

kal bhi hum the aaj bhi hum hain main jaanun ya dil jaane hai

aap ki KHatir jam-o-subu the aap to waqf-e-rang-o-bu the

aaj magar kyon said-e-alam hain main jaanun ya dil jaane hai

'hasrat' ki ghazlon ne aaKHir luT liya mahfil ko lekin

hazrat kaise ahl-e-qalam hain main jaanun ya dil jaane hai