aap ke pahlu mein dushman so chuka

aap ke pahlū meñ dushman so chukā

jā.iye honā thā jo kuchh ho chukā

hañstī hai taqdīr hañs le un ke saath

dil mujhe maiñ apne dil ko ro chukā

haath rakkhā maiñ ne sote meñ kahāñ

bole vo jhuñjhlā ke ab maiñ so chukā

hashr meñ aanā thā pahle se hameñ

ham kab aa.e jab tamāshā ho chukā

ḳhaar us dil ne mujhe kyā kyā diye

mere haq meñ ye bhī kāñTe ho chukā

ab jo ghaTtā hai ghaTe tūfān-e-ashk

apnī qismat kā likhā maiñ dho chukā

bik gayā ammāma ho kar rahn-e-mai

bojh utrā sar se jhagḌā to chukā

tauba kī isyāñ se ab pūchhegā kaun

jam.a kī thī jitnī daulat kho chukā

āftāb-e-hashr kab chamkā 'riyāz'

dāġh-e-mai dāman se jab maiñ dho chukā

aap ke pahlu mein dushman so chuka

jaiye hona tha jo kuchh ho chuka

hansti hai taqdir hans le un ke sath

dil mujhe main apne dil ko ro chuka

hath rakkha main ne sote mein kahan

bole wo jhunjhla ke ab main so chuka

hashr mein aana tha pahle se hamein

hum kab aae jab tamasha ho chuka

KHar us dil ne mujhe kya kya diye

mere haq mein ye bhi kanTe ho chuka

ab jo ghaTta hai ghaTe tufan-e-ashk

apni qismat ka likha main dho chuka

bik gaya ammama ho kar rahn-e-mai

bojh utra sar se jhagDa to chuka

tauba ki isyan se ab puchhega kaun

jama ki thi jitni daulat kho chuka

aaftab-e-hashr kab chamka 'riyaz'

dagh-e-mai daman se jab main dho chuka