aap ki soch se ziyaada tha

aap kī soch se ziyāda thā

ek din mere paas itnā thā

pahlī harakat se ban ga.ī thī baat

pahlī harakat se naqsh ubhrā thā

mujh ko shohrat milī baġhāvat se

varna maiñ bhī ġhulām hotā thā

bolnā aayā baa'd meñ mujh ko

pahle āvāz ko maiñ suntā thā

raushnī phūTne lagī mujh se

terī minnat kā jugnū pakḌā thā

'aks se ret ban ke niklā huuñ

aa.ine kā maiñ kuchh to lagtā thā

log bedār ho ga.e varna

band kamre meñ kis ne sonā thā

raat us us ko sabz ḳhvāb aa.e

sub.h jis jis ne biij bonā thā

us jagah par koī nahīñ thā magar

aap ne kah diyā lihāzā thā

aap ki soch se ziyaada tha

ek din mere pas itna tha

pahli harakat se ban gai thi baat

pahli harakat se naqsh ubhra tha

mujh ko shohrat mili baghawat se

warna main bhi ghulam hota tha

bolna aaya ba'd mein mujh ko

pahle aawaz ko main sunta tha

raushni phuTne lagi mujh se

teri minnat ka jugnu pakDa tha

'aks se ret ban ke nikla hun

aaine ka main kuchh to lagta tha

log bedar ho gae warna

band kamre mein kis ne sona tha

raat us us ko sabz KHwab aae

subh jis jis ne bij bona tha

us jagah par koi nahin tha magar

aap ne kah diya lihaza tha