aapko apni hi bedad-gari yaad nahin

aap ko apnī hī bedād-garī yaad nahīñ

is kā matlab hai mirī ham-safarī yaad nahīñ

ham se mat pūchho sar-e-dasht safar kaisā rahā

itnā bhaTke haiñ ki ab dar-ba-darī yaad nahīñ

kaaT degī yūñhī barsoñ kā safar lamhoñ meñ

'umr-e-daurāñ tujhe āhista-ravī yaad nahīñ

ham ko bhī yaad nahīñ āḳhirī ḳhat kā mazmūn

nāma-bar ko bhī koī nāma-barī yaad nahīñ

ham ne bhī 'ishq kiyā thā kabhī koī 'mariyam'

is se haT ke to koī dard-e-sarī yaad nahīñ

aap ko apni hi bedad-gari yaad nahin

is ka matlab hai meri ham-safari yaad nahin

hum se mat puchho sar-e-dasht safar kaisa raha

itna bhaTke hain ki ab dar-ba-dari yaad nahin

kaT degi yunhi barson ka safar lamhon mein

'umr-e-dauran tujhe aahista-rawi yaad nahin

hum ko bhi yaad nahin aaKHiri KHat ka mazmun

nama-bar ko bhi koi nama-bari yaad nahin

hum ne bhi 'ishq kiya tha kabhi koi 'mariyam'

is se haT ke to koi dard-e-sari yaad nahin